السلام عليكم
هتستغربوا من عنوان الموضوع وهتقولوا ايه علاقه ده بده بس
انا احب اوضح لكم ان الفيشار نوعين
نوع بناكله ونوع بنأكله للناس
نبدأ بطريقع عمل الفيشار اللى بناكله احنا
1) نجيب حله حلوه كده وواسعه
2)نكب فيها شويه زيت او حتتين سمنه حلوين
3) نجيب عليهم شويه فانيليا علشان الريحه تكون جميله طبعا
4) نولع النار ونخليها عاليه شويتين لحد ما نبدأ نسمع صوت الفيشار
5) نبدأ نقلب الفيشار ازاى اننا نمرجح الحله فوق النار قوى علشان ميتحرقش طبعا
6)نجيب الفيشار بعد ما يخلص ونحط عليه شويه ملح ونتسلى باكله
جميل كده؟ اتمنى انكم تعرفوا تعملوه
هتقولى طيب يا ابو حنين ايه علاقه ده بالحكومه
هقولك ده النوع الاول اللى بنعمله احنا ونتسلى بيه
اما النوع التانى وطبعا ده اللى حكومتنا رائده فى صناعة الفيشار فى حارتنا حاره الشرق الاوسط
واللى فيها حبايبنا واتعلموا منها طريقه عمل الفيشار
هتقولى خلص ولخص علشان انا مش فاهم حاجه
هقولك مستعجلش على رزقك كله جاى حاجه حاجه
هقولك ازاى حكومتنا بتقدر تعمل فيشار يكفى 80 مليون
وازاى هتفشر لكل ده
هقولك لما حكومه توعدك بمبانى جديده لاهل العشوائيات
لما حكومتنا تقولك نمونا يعدى 7 فى الميه
ولما حكومتنا تقولنا احنا دوله محوريه فى الشرق الاوسط
ولما حكومتنا تقولنا انا مع محدودى الدخل
ولما حكومتنا تقولنا احنا عندنا تعليم صح
ولما حكومتنا تقلولنا التعليم مجانى والمدرس مخلص فى مدرسته
ولما حكومتنا تقولنا عندنا احطياتى نقدى يعدى 34 مليار
ولما ولما ولما .....
ولما تلاقى ده كله كدب
لما انت تبقى مش فاهم حاجه فى بلدك
لما تبقى مش عارف تبنى شقه
ولما تبقى مش قادر تتجوز
ولما تبقى مش قادره تلاقى عريس طبعا لان لازم يكون معاه شقه
ولما انا وانت وانت وهما نقول فين ايام زمان وياريتها تعود
رغم اللى كان زمان بيشتكى همه وبيقدر يقول لاء ومش هامه
مش بكده حكومتنا استاذه فى عمل الفيشار وبتعرف ازاى تأكله للناس
مش كده حكومتنا تبقى فشاره
دى حكايه عمل الفيشار
يا ترى هناكل فيشار عاملينه بادينا ولا هنفضل ناكل فيشار حكومتنا عاملاه لينا
مستنى رايكم بعد ما تاكلوا فيشار حكومتنا وتعزموا معاكم ولاد حارتنا
حاره الشرق الاوسط